عزيزى ماكليـــش ، عشان ماتجيش تقول ماقالوليش!!

Written by  علاء عطا
Published in علاء عطا
السبت, 27 شباط/فبراير 2016 17:04
Rate this item
(0 votes)
عزيزى ماكليـــش ، عشان ماتجيش تقول ماقالوليش!! عزيزى ماكليـــش ، عشان ماتجيش تقول ماقالوليش!! عزيزى ماكليـــش ، عشان ماتجيش تقول ماقالوليش!!

Advertisement

حينما طرحت فكرة مدرب اجنبى من جديد بعد رحيل ميدو،لم أتفائل كثيراً صراحة بقبول أى اجنبى عاقل بالغ رشيد المهمة بعد قراءته لسيناريو موسمين مر عليهم حوالى 8 مدربين فالموضوع صعب فعلا تقبله بسهولة ولكن كسر مستر ماكليش القواعد وقبل المهمه والتحدي فى تجربة فريدة ولما لا فالرجل لديه سمعه طيبة وبالتالى قبوله هذه المهمة إما ان تكون عن دراية تامة فعلاً باغلب الاشياء او انه سيكتشف بنفسه مستقبلياً كل شئ لذا أردت نصحه سريعاً فربما تفيده النصائح ليتفادى المشاكل ويستمر لنهاية عقده بإذن الله،بس نقول يارب.

*مبدأياً مستر ماكليش رئيس النادى اسمه مرتضى منصور.

*سيدى العزيز مستقبلياً اذا سمعت منه كلمة "خراره" فهى منطقة تتواجد بصحراء مصر الغربية للاستشفاء ويقال ان من يشرب منها يعود للصحراء الغربية من جديد كما يقال عن نهر النيل تماماً ولا صحة لاي ترجمة اخري قد تقال لك عن هذه الكلمة!

*اه بالمناسبة اعلم عزيزى لو سمعت هذه الكلمة فان منصبك قد اصبح فى خطر.

*للاستحواذ علي قلب سيد مرتضى يجب ان تلعب مهاجماً ويفضل باثنين راس حربة،نعم هى طريقة الغيت منذ أن حلق الفنان عاصى الحلانى شنبه ولكن يؤمن بها تماماً رئيس النادى!

*سيدى العزيز لو جاءك احد من الجهاز الفنى المصرى المساعد مطالباً بالسطر الماضى فارجوك اطلب باقالته فوراً.

*فى البداية لو تم استضافتك في برامج تليفزيونية او لقاءات ما بعد مباراة او معسكرات او حتي مؤتمر صحفي لا داعي للاندهاش لو تم طرح عليك اسئلة من نوعية كلت محشي طب عجبك الملوخية طب احكيلنا لحظات فقدان والدتك،عادى عادى ماتاخدش في بالك!

*جمهور الزمالك عاشق للاداء ويفتقد حالياً الالتزام الخططى واللعب المنظم وارتفاع اللياقة و لكى تستتحوذ على قلبه سريعاً حاول اولاً الحفاظ حالياً على اللحاق بالغريم التقليدى وبمرور الوقت نحتاج لثبات شكل خططى لفريق مر عليه 8 مدربين منهم 3 قبلك فقط هذا الموسم ونعلم انك ستحمل على كتفك وحدك هذا العك.

*بالمناسبة،الديربى من اهم الاشياء التى يعول عليها الجمهور فى مصر وبخاصة الزملكاوية ،اسأل كويس عن الموضوع ده وخصوصا بعد علمنا عن حبك للديربيات.

*حاول اخفاء اى صوره لك فى الريف الاسكتلندى ترتدى فيها جيبه اسكتلندية مثلاً وده لمصلحتك انت والله بصوت أحمد التباع حتى لا تجد السيد مرتضى منصور يحملها فى مؤتمر صحفى يوماً ما ، كما نبه على العائله فرد فرد الله يصلح حالك باخفاء هذه الصور.

*بمناسبة النقطة الماضية،لو لك أى خطيئة من أى نوع حتى وان كانت النظر لجارتك اللى بتنشر الغسيل ارجوك اخفيها عشان ماتلاقيهاش برضوا فى الـ "سى دي" الخاص بك!

*بالتأكيد نحن نكن ونحترم العادات والتقاليد ومنها الجيب الاسكتلندية بس رجاء خاص ماتزعلش لو اتقال فى يوم من الايام عن بلدك انها البلد اللى رجالتها بتلبس جيب،ارجوك اعتبرها دعابة فى لحظة غضب.

*اى فكر خاص انك ستجد نظام احترافى فى مصر من انتظام مسابقات او مكان ملعب او اى شئ هو من درب الخيال،يجب ان تتعود على ذلك،حضرتك عارف مستر كوبر،دخل عليه لاعب مصرى معتزل حط جول فى كاس العالم 90 ذو لحية قال له " سلامو عليكم " وسط المؤتمر وقعد و لو حصل كده قدامك بلغ عنه انه ارهابى.

*ضع كل شروطك قبل التوقيع النهائى للعقود،وبالله عليك حط شرط جزائى محترم،احنا قابلين.

*اثناء المؤتمر الصحفى لتقديمك،لو سمعت ترجمة بعض الجمل "أى ويل كيك هيز آس" او"جو تو هيل" او"ذا مازر ****" او جمل تشابه اعلم انها موجهه للمدير الفنى الماضى وهذه لظروف خاصة ولم يحدث ان تم نطقها فى اى مؤتمر صحفى(سامحنى يارب عالكدب).

*لو كنت تحتسى اى كحوليات،رجاء خاص خليها فى الحجره الخاصة بك،واشرب اللى تشربه طالما بتكسبنا قشطة و لو لا قدر الله اى حاجة تانية افتكر النصيحة ديه.

*حاول برضوا لو بتشرب بيبسى او اى مشروب غازى ماتبقيش شوية فى الكوباية عشان عندنا الصحفيين بيصوروا الحاجات ديه ويقولك "شاهد فضيحة ماكليش وهو يشرب الكحوليات فى عز نهار رمضان وهو يسب مصر"،اسمع منى بس!

*وانت بتتفرج على ماتشات الزمالك هتتخض شوية فبالله عليك علم المدافعين بتوعنا ازاى يقفوا صح وعلى خط الوسط امتى يضغطوا صح بالله عليك سجل كل النقاط ديه ومعلش لو فيها رزاله ابقى علم الرجالة ازاى تخلص انفرادات عشان بيضيعوا كتير اوى ونصيحة بقى اخوية ابقى علمهم ضربات الجزاء بتتشاط ازاى عشان ديه بتقيل مدرب عندنا!

*لو ينفع تقعد فى فيلا فخمة فى حى الزمالك اعملها وبلاش فنادق،اسمع بس كلامى وبلاش تفاصيل بقى اكتر من كده ارجوك.

*لو سمعت اسمك بدأ يتقال "ماكدونالد" "ماكجيفر" "ماكنتوش" " براطيش" "مناقيش" استعد يا وحش الخليج كده بيناديك!

عزيزى مستر ماكليش نستحلفك بكل معانى الانسانية الاسكتلندية ان تكون المنقذ من هذا السحيق الذى نعيش فيه حالياً ،حقيقة نتعشم فيك اكثر مما تتخيل فلك ان تعرف اننا لم نهنأ حتى بعودة دورى غائب،قراءتنا لسيرتك الذاتية وشخصية الانجليز الصارمة تجعلنا نحلم معك ولكن نتمنى ان تقرأ جيداً فكر العقليات التى ستتعامل معها سواء لاعبين او اداريين وتحاول على ارتقاءها ناحيتك لتصبح المنظومة اكثر احترافيه.

واخيرا لمرتضى منصور،افعلها ولو مرة واحده.........،ولا اقولك تصدق انا كنت هقول حاجات قولتها بتاع 30 مرة فى 30 مقال قبل كده،انا مش هنصح خلاص،انت عارف كل حاجة وعارف ازاى تخلق مناخ ناجح بسهولة وربنا يسهل!



 

علاء عطا 


Advertisement


Read 53534 times

zamalek.tv

Connet With Us

اتصل بنا

Tel: 00201001230617

Email: عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

Website: http://www.zamalek.tv

 

Our Sponsors